Қазақстанда машина жасауды дамыту жөніндегі жаңа кешенді жоспар әзірленіп жатыр
АСТАНА. ҚазАқпарат - ҚР Премьер-Министрі Әлихан Смайылов Қазақстан машина жасаушылар одағының басқарма төрағасы Мейрам Пішембаевпен кездесті, деп хабарлайды ҚазАқпарат Үкіметтің ресми сайтына сілтеме жасап.
Бірлестік басшысы Мемлекет басшысының тапсырмасымен әзірленіп жатқан саланы дамытудың алдағы 5 жылға арналған кешенді жоспарының негізгі бағыттарына тоқталды. Оның ішінде машина жасау саласының өндіріс көлемін арттыру, инвестиция тарту, өндірістік және экспорттық мүмкіндіктерді дамыту, отандық өнім үшін өткізу нарығын кеңейту және сала үшін білікті кадрлар даярлау жүйесін жетілдіру шаралары бар. Кешенді жоспарды жүзеге асыру отандық машина жасау саласын дамудың түбегейлі жаңа деңгейіне шығарады деген болжам бар.
Кездесу барысында салалық кәсіпорындарды отандық шикізатпен қамтамасыз ету, машина жасаудағы шағын және орта кәсіпкерлікті қолдау және салықтық ынталандыру мәселелері талқыланды.
Сонымен қатар Мейрам Пішембаев Премьер-Министрді осы жылдың 11-12 мамырында өтетін Қазақстан машина жасаушыларының XI форумына дайындық барысы туралы хабардар етті.
Кездесу қорытындысы бойынша Әлихан Смайылов Кешенді жоспарды әзірлеу бойынша бірқатар ұсыныс беріп, саланы дамытуда бизнес-қоғамдастығының нақты ұсыныстарына баса назар аудару керектігін атап өтті.
