Қазақстанда мектепке дейінгі білім балалардың барлығына қолжетімді емес
АСТАНА. ҚазАқпарат - Мектепке дейінгі білім алу құқығы - баланың басты құқықтарының бірі, алайда Қазақстандағы балалардың бестен бірі оған қол жеткізе алмай келеді. Бұл жайлы Сандж Зерттеу орталығының сарапшылары мәлімдеді, деп хабарлайды ҚазАқпарат.
Орталықтың сарапшылары 2017 жылы «ҚР-да бала құқықтарын қорғау саласындағы жағдайды тәуелсіз мониторингілеу және талдау» атты зерттеу жүргізді.
Шалғай ауылдарда ата-аналардың 59%-і балабақша жетіспеушілігін айтып шағымданады. Олардың сөзіне қарағанда, баласы бар үйдің материалдық жағдайы мектепке дейінгі білім мекемесіне баруына қатты әсер етеді. Ондай қызметке қолы жетпейтінін айтқан ата-аналардың 57%-інің материалдық жағдайы нашар.
Бұл жайтқа ата-аналар наразы. Олардың 40%-тен астамы баласының құқығы толық сақталмай жатқанын, ал кейбір ата-аналар мүлдем сақталмайтынын айтып шағымданады. Елді мекендердегі үйірмелер мен спорт секцияларының аздығынан балалардың теледидар мен интернетке тәуелді болуы ата-аналарды алаңдатып отыр. Балалар арасында сауалнама жүргізілгенде, олардың 37%-і түрлі үйірмелерге баратыны белгілі болды.
Зерттеу ҚР Дін істері және азаматтық қоғам министрлігінің қолдауымен Азаматтық бастамаларды қолдау орталығының мемлекеттік гранты аясында жүргізілді.
