Қазақстанда мемлекеттік кірістер органы қызметкерлеріне сыныптық шендер енгізілмек
НҰР-СҰЛТАН. ҚазАқпарат – Қазақстанда мемлекеттік кірістер органы қызметкерлеріне сыныптық шендер енгізу қажет. Мұндай ұсынысты бүгін Үкімет отырысында ҚР Қаржы министрі Ерұлан Жамаубаев жасады, деп хабарлайды ҚазАқпарат тілшісі.
«Сыбайлас жемқорлыққа қарсы іс-қимыл агенттігі және «Адалдық Алаңы» жобалық кеңсесі мемлекеттік кірістер органы қызметкерлерінің еңбекақысының төмен болуына, әлеуметтік қорғалмауына және жоғары жауапкершілікке байланысты сыбайлас жемқорлыққа ұшырау қаупі бар екенін атап өтті», - деді ол.
Оның атап өтуінше, мұндай жағдай тәжірибелі қызметкерлердің кетуінің жиілеуіне және алған білімдері мен дағдыларын басқа жерлерде қолдануына әкеледі.
«Осыған байланысты базалық жалақыға үстемақының қосылуын және бірыңғай нысанды киім-кешекті енгізе отырып, сыныптық шендерді енгізу ұсынылады. Аталған шаралар кадрлардың жоғары біліктілігі мен сабақтастықты сақтауға, сыбайлас жемқорлық деңгейін төмендетуге, сондай-ақ мемлекеттік кірістер органдарының мәртебесін арттыруға мүмкіндік береді», - деді Ерұлан Жамаубаев.
