Қазақстанда МЖӘ жобаларын қарау мерзімі қысқарады
АСТАНА. ҚазАқпарат - Қазақстанда мемлекеттік-жекешелік әріптестік жобаларын қарау мерзімі айтарлықтай қысқартылады. Бұл туралы бүгін Үкімет үйіндегі баспасөз мәслихатында «Қазақстандық мемлекеттік-жекешелік әріптестік орталығы» АҚ басқарма төрағасының орынбасары Талғат Матаев айтты, деп хабарлайды ҚазАқпарат.
«Қазіргі уақытта заңнаманы жетілдіру аясында жұмыстар жүргізілуде және басты өзгерістердің бірі мемлекеттік-жекешелік әріптестік жобаларын келісу әрі сараптау мерзімін 7 айдан 3 айға дейін қысқарту арқылы оңтайландыру көзделуде»,- деді ол.
Оның айтуынша, «Қазақстандық мемлекеттік-жекешелік әріптестігі туралы» заң қабылданғаннан бері әріптестіктің түрлі жобалары талқылаудан өтіп, тетіктері іске аса бастаған.
«Мемлекеттік-жекешелік әріптестіктің тиімділігін уақыт көрсетті. Енді оны іске асырудың тетігін әлі де болса жетілдіру керек. Осы орайда кәсіпкерлердің ұсыныс-пікірлерін назарға ала отырып, бірлесе жұмыс істеудің тетіктері жеңілдетілді», - деді Матаев.
Басқарма төрағасы орынбасарының сөзіне қарағанда, «ҚР-ның кейбір заңнамалық актілеріне бюджет заңнамасын жетілдіру мәселелері бойынша өзгерістер мен толықтырулар енгізу туралы» заң жобасында мемлекеттік-жекешелік әріптестікті жетілдіруді қамтитын шаралар көзделген. Бұл заң жобасы бүгінде Мәжілісте мақұлданып, Сенат қарауына ұсынылып отыр. Заң жобасына сәйкес МЖӘ-ні жаңғырту тетіктері 9 тармақты қамтиды.
