Қазақстанда некеге тұрғандар қатары көбейді
АСТАНА. ҚазАқпарат – Елімізде неке қию көрсеткіші өсті. Дегенмен, кейінгі он жылмен салыстырғанда әлі де төмен, деп хабарлайды ҚазАқпарат Бірінші кредиттік бюроға сілтеме жасап.
«Биылғы жылдың II тоқсанында 29,3 мың неке тіркелді. Бұл - өткен жылмен салыстырғанда 6,1% немесе 1,7 мыңға артық. Аталған деректі Ұлттық статистика бюросы келтіріп отыр. Дегенмен, көрсеткіш неке қию оптимизміне аса әсер етпейді. Биылғы сәуір-маусым аралығындағы неке қию саны - соңғы 10 жылдағы ең төменгі көрсеткіш. 2020 жылдың II тоқсанындағы көрсеткіш тіпті аз болған (16,6 мың неке қиылды). Жағдайға пандемия әсер етті. Жалпы, 2014 жылдан елімізде неке қию көрсеткіші 20,4% немесе 7,5 мыңға қысқарды», - делінген бюро хабарламасында.
Ақпаратта айтылғандай, неке қию өсімі өңірлерде жиі байқалады.
«Неке қиюдан жылдық өсім бойынша көш басында - Алматы облысы. Екінші орында - Қарағанды облысы. Керісінше оңтүстіктегі 5 өңірде неке қию көрсеткіші азайған, оның ішінде Алматы қаласы да бар», - дейді бірінші кредиттік бюродан.
