Қазақстанда өтетін биатлоннан әлем чемпионатына 41 елден спортшылар келеді

АСТАНА. ҚазАқпарат – Бурабайда өтетін биатлоннан әлем чемпионатына 41 шет мемлекеттен 500-ге жуық спортшы келеді. Бұл туралы Орталық коммуникациялар қызметінде өткен брифингіде спорт және дене шынықтыру істері комитетінің төрағасы Самат Ерғалиев айтты, деп хабарлайды ҚазАқпарат тілшісі.

«Қазақстанның тарихында алғаш рет осындай деңгейдегі биатлоннан жасөспірімдер мен жастар арасындағы әлем чемпионаты өткелі тұр. Ол 4-12 наурыз аралығында Ақмола облысының Щучинск қаласында орналасқан қысқы спорт түрлері бойынша олимпиадалық даярлау орталығының шаңғы-биатлон кешенінде өтпек. Қазіргі таңда бұл жарысқа әлемнің 41 мемлекетінен 500-ге жуық спортшы келуге ниет білдіріп отыр. Қазақстан атынан қатысатын жеткіншектерді 26 ақпанда өтетін ҚР кубогінде жасақтаймыз. Онда спорттың бес түрі бойынша 18 жарыс жоспарланған», - деді Самат Ерғалиев.

Еске сала кетейік, биыл көктемде Астанада шахматтан әлем чемпионаты өтеді.