Қазақстанда спорттық құрал-жабдықтардың зауыты салынбақ
АСТАНА. 9 шілде. ҚазАқпарат - Қазақстанда дене шынықтыру-сауықтыру кешендері мен спорттық құрал-жабдықтар үшін модульдерді шығаратын зауыттың құрылысы жоспарлануда.
Бұл туралы бүгін Үкімет отырысында ҚР Спорт және дене шынықтыру істері агенттігінің төрағасы Ерлан Қожағапанов мәлім етті.
Агенттік басшысының айтуынша, бұл жобаларды Үдемелі индустриялық-инновациялық даму мемлекеттік бағдарламасы аясында салу жоспарланып отыр.
«Спорт инфрақұрылымы өсімінің тұрақты үрдісі байқалғанымен, елімізде спорттық құрал-жабдықтардың және оқу орындары мен тұрғылықты жерлерде, жаппай демалыс орындарында, әсіресе, ауылдық жерлер мен кәсіпорындарда спорттық мүліктердің көлемі жеткіліксіз»,-деді ол.
«Талдау мәліметтеріне сәйкес, 7 мыңнан астам жалпы білім беру мектептерінің 5,5 мыңында ғана жеке спорт залдары бар көрінеді. Сонымен қатар олардың материалдық-техникалық қамтылуы оқу үдерісінің қажетті дейгейінің талаптарына сай келмейді»,-дейді агенттік басшысы.
Оның сөзіне қарағанда, спорттық жабдықтар негізінен ауылдық мектептерде жетіспейді.
