Қазақстанда талантты жастардан жасақталған шығармашылық взвод құрылды

АСТАНА. ҚазАқпарат – Мамырда ҚР Қарулы Күштері Ұлттық әскери-патриоттық орталығының базасында мерзімді әскери қызметке шақырылған сарбаздардың арасынан шығармашылық взвод жасақталды.

Оның құрамындағы бозбалалар тек ұрыс тактикасына ғана машықтанып қоймай, сонымен қатар ән шырқап, би билеп, мобилография бойынша шығармашылығын шыңдап жүр, деп хабарлайды ҚазАқпарат тілшісі.

Ұлттық әскери-патриоттық орталық бастығының тәрбие және идеологиялық жұмыс жөніндегі орынбасары Ерболат Жүсіповтің айтуынша, мұндай ерекше взводты құру - шығармашылық жастардың дамуы үшін бірегей мүмкіндік.

«Жас әскерге шақырылушының шығармашылық әлеуетін дамыту мақсатында взвод құрылды. Шығармашылық взводқа 21 әскерге шақырылушылар іріктеліп алынды. Онда сарбаздар икемді бағытына қарай үшке бөлінді: хореография, вокал-аспаптық және аралас, яғни журналистер мен мобилографтар. Взводқа бөлімше командирлері, сержанттар немесе тиісті білімі бар командир тағайындалады. Жалпы шығармашылық взвод болашақта тұрақты негізде жұмыс істейді. Мұны жігіттер үшін «әлеуметтік лифт» деп айтсақ та болады. Өйткені, олар еліміздің Қарулы Күштерінің шығармашылық ұжымдарында келісімшарт бойынша қызметін жалғастыра алады», - деді Ерболат Жүсіпов.

Мұнда жас сарбаздарға кәсіби мамандардан білім алып, өздерінің шығармашылық шеберлігін одан әрі шыңдай түсуіне мүмкіндік беріледі.

Взвод қатарына алынғандардың бірі - 19 жастағы елордалық Ғафу Қабиболла. Ол көпбалалы отбасынан шыққан. Қоғамдық тамақтану және сервис колледжінің үшінші курсында оқып жүріп, әскер қатарына шақырылыпты.

«Маған видео түсіріп, оны өңдеген ұнайды. Бұл өте қызық және табандылық пен ұшқыр қиялды қажет етеді. Мен түрлі курстарға қатысып, мобилографияны өз бетімше үйрендім. Әрине, шығармашылық взвод қатарына қосылғаныма қуаныштымын. Бұл менің болашағым үшін таптырмас мүмкіндік әрі тәжірибе», - деп пікір білдірді Ғафу Қабиболла.

Орталық басшысының орынбасары Ерболат Жүсіповтің сөзінше, мұндай ерекше взвод қатарына қабылданған сарбаздардың ата-аналары да ризашылығын білдіруде. Өйткені, олар әскер қатарында жүріп, өздерінің сүйікті істерінен қол үзбейді, керісінше жетіліп, дами түседі.