Қазақстанда травматикалық қаруға тыйым салынуы мүмкін

АСТАНА. 28 мамыр. ҚазАқпарат - Алдағы уақытта травматикалық қаруға тыйым салынуы мүмкін. Бұл туралы «Эксперт» клубының «Қазақстанның құқық қорғау жүйесін жаңғырту» тақырыбындағы отырысында Парламент Мәжілісінің депутаты Нұрлан Әбдіров мәлім етті.

Оның айтуынша, бүгінде осы мәселеге қатысты заң жобасы депутаттардың талқылауына түсті. «Онда, біріншіден, травматикалық, сондай-ақ газды қару-жараққа тыйым салу қарастырылған. Екіншіден, оның барлығын адамның жеке қорғанысы үшін қолданылатын қарулардың санатынан шығару жоспарланып отыр», - дейді Н.Әбдіров. Халық қалаулысы атап көрсеткендей, «Қару-жарақтың кейбір түрлерінің айналымы туралы» заңда травматикалық қаруды халықтан сатып алу тетігі бар. «Онымен құқық қорғау органдары мен күзет қызметтерін қамтамасыз етуге әбден болады», - дейді депутат.