Қазақстанда тұңғыш рет Әйелдердің халықаралық бизнес форумы өтеді

АСТАНА. ҚазАқпарат - 4 наурыз күні елордада Zhaina І халықаралық әйелдер форумы өтеді. Елімізде алғаш рет өтетін шара әйелдер үшін ынталандырушы бизнес алаң болмақ, деп хабарлайды ҚазАқпарат zhaina-forum.kz сайтына сілтеме жасап.

Форумда Қазақстан, Ресей, Украина, Беларусь, Сингапур және АҚШ-тан келген табысты бизнес-ледилер мен үздік спикерлер өмірлік мақсатқа жету жолындағы шынайы жетістіктерімен бөлісетін болады. Жоба өз саласында көшбасшы атанғысы келетін 500-ден астам әйелдің басын қосады.

Спикерлер қатарында Астана халықаралық қаржы орталығының цифрлық технологиялар жөніндегі директоры Әсел Жиенбаева, шахматтан әйелдер арасында халықаралық гроссмейстер Динара Сәдуақасова, жартылай жеңіл (IBO) және жеңіл (WIBA) салмақта әлем чемпионы Фируза Шәріпова, бизнес жаттықтырушы әрі оқытушы Дженифер Льюис (АҚШ), Community іскерлік басылымының шеф-редакторы Татьяна Люлька (Украина), әйелдерге арналған LADY.TUT.BY сайтының жетекшісі Светлана Зере (Беларусь), жазушы, бизнес-жаттықтырушы Лариса Парфентьева (Ресей), халықаралық Success Resources компаниясының тең құрылтайшысы Вероника Тан (Сингапур) бар.