Қазақстанда тұтынушылық несие алу көбейген
Жыл басынан бері экономикаға берілген кредиттер 15,3%-ға ұлғайып, 26,3 трлн теңгеге жетті. Бұл жөнінде ҚР Қаржы нарығын реттеу және дамыту агенттігі төрағасының орынбасары Олжас Қизатов айтты, деп хабарлайды Kazinform тілшісі.
«Жеке тұлғаларға берілген кредиттер 22,4%-ға өсті. Олар негізінен тұтынушылық кредиттердің 25,4%-ға және ипотекалық кредиттердің 11,8%-ға ұлғаюы есебінен өсті», - деді О. Қизатов Орталық коммуникациялар қызметінде өткен баспасөз мәслихатында.
Спикердің айтуынша, бизнеске берілген кредиттер шағын және орта бизнес кредиттерінің өсуі есебінен 14,9% ұлғайып, 10,4 трлн теңгеге жеткен.
«Биыл еліміздің барлық өңірлерінде экономикаға несие берудің өскенін атап өту қажет. Жыл басынан бері Алматы облысында 54,9%, Ұлытау облысында – 35,8%, Түркістан облысында – 31,6%, Абай облысында – 28,3%, Маңғыстау облысында – 27,4%, Жамбыл облысында – 22,5%, Қызылорда облысында – 20,1% айтарлықтай өсу байқалады. Бұл ретте берілген кредиттер негізінен республикалық маңызы бар қалаларда шоғырланған: Алматы – 42,2%, Астана – 13,6%, Шымкент – 5,7%», - деді агенттік өкілі.
Салалар бойынша экономикаға кредит берудің едәуір үлесі өнеркәсіпке – 11,5% және саудаға – 10,2% тиесілі. Жыл басынан бері салалар бойынша кредиттер құрылымының елеулі өзгеруі байқалмайды.
Айта кетейік, Қазақстанда екінші деңгейдегі 21 банк жұмыс істейді. Жыл басынан бері олар 1,8 трлн теңге мөлшерінде пайда тапқан.