Қазақстанда тұтынушы қоржыны 5 жыл сайын өзгеріп отыруы тиіс - Т.Дүйсенова
АСТАНА. ҚазАқпарат - Қазақстанда тұтынушы қоржыны 5 жыл сайын өзгеріп отыруы тиіс. Бұл туралы бүгін ҚР Президенті жанындағы Орталық коммуникациялар қызметінің брифингісінде ҚР Еңбек және халықты әлеуметтік қорғау министрі Тамара Дүйсенова мәлім етті.
«Біз әлемде тұтынушы қоржынын әрбір 5 жыл сайын өзгерту тәжірибесі барын хабарладық. Қазіргі уақытта біз Қазақ тағамтану академиясымен бірге бұл мәселені пысықтадық», - деді министр.
Оның сөзіне қарағанда, әлеуметтік стандарттардың ең төменгі деңгейіне қатысты заң жобасы жасақталуда. «Стандарттардың базалық көрсеткіші күнкөрістің ең төменгі деңгейі болмақ», - деп атап өтті Т.Дүйсенова.
Айта кетейік, бүгінгі таңда Қазақстанда тұтынушы қоржыны 19 966 теңгені құрап отыр.
