Қазақстанда ҰҚШҰ ұжымдық күштерінің оқу-жаттығуын өткізу жоспарланған
МӘСКЕУ. ҚазАқпарат - Мәскеудегі Ұжымдық қауіпсіздік туралы шарт ұйымының дағдарысқа ден қою орталығында ҰҚШҰ Біріккен штабының баспасөз конференциясы өтті, деп хабарлайды ҚР Қорғаныс министрлігінің баспасөз қызметі.
Конференция онлайн түрде өтті. Оған аталған ұйымға мүше елдердің қорғаныс ведомстволары мен бұқаралық ақпарат құралдарының өкілдері қатысты.
Ұжымдық қауіпсіздік туралы шарт ұйымы Біріккен штабының бастығы генерал-полковник Анатолий Сидоров ұйымның жауапкершілік аймағындағы: Шығыс Еуропа, Кавказ және Орталық Азия аймақтарындағы әскери-саяси ахуалға баға берді.
Баспасөз конференциясында ҰҚШҰ Ұжымдық қауіпсіздік жүйесінің күштері мен құралдарын басқару органдары мен құралымдарының өткен жылғы бірлескен дайындығының қорытындысы шығарылды.
Негізгі күш-жігер ҰҚШҰ әскерлерін (ұжымдық күштерді) басқару жүйесі мен күштерін қолдану және оларды іске асырудағы шешімдерді қабылдау тетіктерін жетілдіруге бағытталғаны атап өтілді.
2022 жылы Қазақстанда «Эшелон» материалдық-техникалық қамтамасыз ету күштері мен құралдарының арнайы оқу-жаттығуын, «Іздеу» барлау күштері мен құралдарының арнайы оқу-жаттығуын және ҰҚШҰ жедел ден қою ұжымдық күштерінің «Өзара іс-қимыл» бірлескен оқу-жаттығуын өткізу жоспарлануда.
Баспасөз конференциясының соңында ҰҚШҰ Біріккен штабының бастығы генерал-полковник Анатолий Сидоров ҰҚШҰ-ға мүше елдердің бұқаралық ақпарат құралдары өкілдерінің сұрақтарына жауап берді.
