Қазақстанда вакцина жеткізу кестеге сәйкес жүргізіліп жатыр – ҚР ДСМ
НҰР-СҰЛТАН. ҚазАқпарат – Қазақстанда вакцина жеткізу кестеге сәйкес жүргізіліп жатыр. Бұл туралы ҚР Денсаулық сақтау министрі Алексей Цой айтты, деп хабарлайды ҚазАқпарат тілшісі.
«Қазіргі уақытта Қазақстанда вакцина жеткізу кестеге сәйкес жүргізіліп жатқанын атап өту өте маңызды. Бүгінде өңірлерге шамамен 6,2 млн вакцина дозасы жеткізілді. Қазір 2 587 884 адам 1-компонентті алды. Бұл екпе алуға жататын халықтың 26 пайызын құрайды. Екінші компонент 1 480 309 адамға салынды», - деді министр Орталық коммуникациялар қызметіндегі баспасөз мәслихаты барысында.
Оның дерегінше, республикада вакцинаның 1 млн-нан астам бірінші және 1 млн-нан астам екінші компонент қалдық дозасы бар.
«Жеткізу кестесі нақты бекітілген. Біз вакцинаны жарамдылық мерзімімен кезең-кезеңмен алып жатырмыз. Қазірге дейін үлкен үгіт жұмысы жүргізілді. Өңірлермен, мемлекеттік органдармен бірге аймақтық және орталық бұқаралық ақпарат құралдарында 3,5 мыңнан астам жарияланым, 17 мың материал жарық көрді», - деді Алексей Цой.
