Қазақстанда ядролық және радиациялық оқиғаларға жедел ден қою орталығы ашылды

ҚР Атом энергиясы жөніндегі агенттігі баспасөз қызметінің хабарлауынша, Орталық Қазақстан мен АҚШ арасындағы ынтымақтастық аясында АҚШ Энергетика министрлігінің Ядролық қауіпсіздік жөніндегі ұлттық әкімшілігінің (DOE/NNSA) қолдауымен құрылды.

Ашылу рәсіміне Қазақстан Республикасының Атом энергиясы жөніндегі агенттігінің, АҚШ-тың Қазақстандағы елшілігінің және АҚШ Энергетика министрлігінің Ядролық қауіпсіздік жөніндегі ұлттық әкімшілігінің өкілдері қатысты.

Орталықтың негізгі міндеттері – радиациялық жағдайды мониторингтеу және талдау, жедел ақпарат алмасу, сондай-ақ ядролық және радиациялық оқиғалар туындаған кезде іс-қимылдарды үйлестіру.

Орталықтың жұмысы жедел әрі негізделген шешімдер қабылдау үшін қажетті шынайы ақпаратты уақтылы алуға мүмкіндік береді.

-Орталықтың ашылуы Қазақстанның ядролық және радиациялық қауіпсіздігінің ұлттық жүйесін нығайтудағы маңызды қадам болып саналады. Оның қызметі ықтимал ядролық және радиациялық оқиғаларға ден қоюға әзірлікті арттыруға, сондай-ақ мемлекеттік органдар мен бейінді ұйымдар арасындағы өзара іс-қимылды дамытуға ықпал етеді,-делінген хабарламада.

Алдағы уақытта орталықтың техникалық және талдамалық мүмкіндіктерін дамыту, ведомствоаралық өзара іс-қимылды жетілдіру, мамандарды даярлау және олардың біліктілігін арттыру, сондай-ақ практикалық жаттығулар өткізу жоспарланып отыр.

Қазақстан атом энергетикасындағы әлеуетін әлемге таныстыған болатын.