Қазақстанда жасалған SsangYong Rodius көлігінің құны қанша болатыны белгілі болды
АСТАНА. ҚазАқпарат - Қазақстанда «Агромашхолдинг» ЖШС базасында құрастырылған SsangYong Rodius отбасылық жол талғамайтын көлік сатылымға 10 ақпанда шығады, ал оның құны 5,45 млн теңгеден басталады, деп хабарлайды компанияның баспасөз қызметі.
«Көліктің басты ерекшелігі - оның сыйымдылығы мен үлкендігі. Бес есікті Rodius көлігіне 7 адам сыяды, қосымша орындықтар 3-қатарда ыңғайлы орналасқан. Орындықтар түсірілген кезде оның жүк салғышы 3000 литрге дейін үлкейеді», - делінген зауыт хабарламасында.
Көлік барлық заманауи технологиялармен жабдықталған. Жаңа SsangYong-тің ұзындығы - 5,13 метр, ені - 1,915, биіктігі - 1,815 метр. «АгромашХолдинг» зауыты SsangYong Rodius-ті қазіргі уақытта 2 литрлік дизель қозғалтқышымен шығаруда.
