Қазақстанда жасанды интеллектіні қауіпті деп есептей ме
АСТАНА. KAZINFORM – Қазақстанда жасанды интеллектінің дамуына қолдау жасалады. Бұл туралы Жасанды интеллект және цифрлық даму вице-министрі Ғиззат Байтұрсынов айтты.
Бүгін Үкімет отырысынан кейінгі баспасөз мәслихатында Қазақстанның жасанды интеллектіге қатысты ұстанымы бойынша сұрақ қойылды.
- Жасанды интеллект жайлы біздің елдің ұстанымы қандай? Сіздер жалпы осы жасанды интеллект қауіпті деп есептейсіздер ме?, - деп сұрады тілшілер.
Өз кезегінде Ғ. Байтұрсынов ведомствоның бұл сала бойынша ұстанымын түсіндірді.
- Біздің негізгі позицияға тоқталсақ, жасанды интеллект адамды алмастыра алмайды, яғни адамның көмекшісі ретінде жұмыс істейді. Бұл дегеніміз — мысалға, қандай да бір жұмысты алсақ, сол процесті жеделдету үшін немесе өзіңнің бір атқарған жұмысыңды нақтылап тексеру үшін, сондай-ақ деректер көп келетін болса, сол ақпаратты алдын ала бір фильтрден өткізу үшін қолданылатын тетік ретінде қарастырамыз, - деді вице-министр.
Оның айтуынша, министрлік жасанды интеллектінің дамуын қолдайды.
- Осы бойынша көптеген жұмыстарды қазіргі уақытта атқарып жатырмыз. Осы жыл «Жасанды интеллект және цифрландыру жылы» болып қабылданды. Сол себепті біз осы ұстанымдамыз, - деді Ғиззат Байтұрсынов.
Бұған дейін хабарланғандай, Жасанды интеллект және цифрлық даму вице-министрі жасанды интеллектігінің ақылы тарифтерін мектеп оқушылары мен студенттерге тегін жасау мүмкіндігіне қатысты пікір білдірді.
