Қазақстанда жетім балаларды туыстарының асырап алуына жеңілдіктер беру қажет
АСТАНА. ҚазАқпарат - Қазақстанда жетім балаларды туыстарының асырап алуына жеңілдетілген режім енгізу қажет. Бұл туралы ҚР Бас прокуроры Асхат Дауылбаев мәлім етті.
«Ұлттық салт-дәстүрді ескере отырып, баланы жақын туыстарының асырап алуына жеңілдетілген режім енгізу қажет. Бұл бірқатар проблеманы шешуге мүмкіндік береді, әсіресе дәстүрлі қағидалар күшті ел өңірлерінде барынша өзекті», - деді Бас прокурор.
А.Дауылбаевтың пайымынша, бала асырап алу процедураларын жеңілдету асырап алушы отбасындағы оның тәлім-тәрбиесіне әрі өмір сүру жағдайына бақылау жүргізуді күшейтуді қажет етеді.
«Осыған орай есеп беру туралы заң талаптарын орындамағаны үшін асырап алушының асыранды балаға қатысты ата-аналық құқығын айыруға дейінгі жауапкершілігін енгізу мүмкіншілігін қарау ұсынылады», - деді ол.
