Қазақстандық бапкер 10 жылға бас бостандығынан айырылды

АСТАНА. KAZINFORM – Ақмола облысы Аршалы ауданы Балалар мен жасөспірімдер спорт мектебі шаңғы спортының жаттықтырушысы «Ш» есірткі заттарды таратумен заңсыз айналысқан үшін 10 жылға бас бостандығынан айырылды.

Ақмола облысының қылмыстық істер жөніндегі мамандандырылған ауданаралық сотының баспасөз қызметі таратқан мәліметке сүйенсек, Аршалы ауданында өткізу үшін Астанадан есірткі заттарын тасымалдау кезінде «Ш»-ны полиция қызметкерлері ұстаған және оның автокөлігін тінтуде жалпы салмағы 39 кг асатын гашиш салынған 4 пакет табылып, тәркіленген.

«Осылайша «Ш.» есірткі заттарын сату үшін аса ірі мөлшерде заңсыз сатып алуды, сақтауды, тасымалдауды жүзеге асырды (Қылмыстық кодекстің 297-бабы 3-бөлігінің 3-тармағы). «Ш.»-ның кінәсі оның автомашинасын тінту және есірткі заттары салынған пакеттерді алу хаттамасымен; сарапшылардың қорытындыларымен; тіркелген қоңыраулары көрсетілген ұялы телефонды тексеру хаттамасымен; бейнекамералардың жазбаларымен; тінту хаттамаларымен; «Ш.»-дан жеке пайдалануға арналған есірткі затын сатып алған куәгерлердің айғақтарымен және істің басқа да материалдарымен дәлелденді. Жаза тағайындауда сот жеңілдететін мән-жайларды - сотталушыда жас балалардың болуын, және ауырлататын мән-жайлардың болмауын ескерді» делінген хабарламада.

Сот үкімімен «Ш» 10 жылға бас бостандығынан айырылды. Тәркіленген есірткі заттар жойылды.

Үкім заңды күшіне енген жоқ.