Қазақстандық әншілердің атына шетелдік авторлардан шағым түскен жоқ - ҚР Әділет министрлігі
АСТАНА. ҚазАқпарат - Қазақстандық эстрада орындаушыларына шетелдің авторлары шағымданған жоқ. Бұл туралы «ҚазАқпарат» агенттігінің сауалына ҚР Әділет министрлігінен хабарлады.
Айта кетейік, бүгінде әлемде авторлық құқықты қадағалауға ерекше мән беріліп отыр. Бұл ретте шетелдік және отандық эстрадада плагиатқа жол берілгендігі жөнінде ақпарат БАҚ-та хабарланып жүргені белгілі. Осы орайда қазақстандық орындаушыларға қатысты шетел авторларынан арыздар мен айыптаулар бар-жоғы жайында құзырлы ведомстводан білуді жөн көрдік.
«Қазіргі кезде шетелдік авторлардан қазақстандық эстрада орындаушыларының атына келіп түскен өтінімдер мен шағымдар жоқ»,-деп атап өтілген ҚР Әділет министрлігінің мәліметінде.
