Қазақстандық әскери қызметшілер Рио-де-Жанейрода өтетін 5-ші әлемдік Армиялық ойындарға қатысады
АСТАНА. 8 шілде. ҚазАқпарат - Ағымдағы жылғы 16-24 шілде аралығында Рио-де-Жанейро қаласында әскери қызметшілер арасында 5-ші әлемдік Армиялық ойындар өтеді. Бұл ақпаратты ҚР Қорғаныс министрлігінің баспасөз қызметінен хабарлады.
Ведомствоның атап өтуінше, ойындарға Қазақстан Қарулы Күштерінің 52 спортшыдан тұратын құрама командасы қатысып, спорттың 7 түрінен, атап айтқанда баскетбол, бокс, дзюдо, жеңіл атлетика, парашют спорты, таэквондо, триатлоннан өнер көрсетеді.
Бұл додадаға әлемнің 108 елі спорттың 21 түрі бойынша өз командаларын үкілеп қосқалы отыр. Мамандардың болжауынша, шамамен 7 мыңнан астам спортшы қатысатын бұл сайыс көлемі жағынан әскери ойындар тарихындағы ең ауқымдысы болмақ.
Қазіргі таңда Армиялық спорттың бүкіләлемдік кеңесін (CISM) әлемнің 133 елі Қарулы Күштерінің делегациясы құрайды. Бұл спорт ұйымы Халықаралық Олимпиадалық комитет пен Студенттік спорт одағынан кейінгі кешенді спорттық жарыстар өткізетін бірден-бір ұйым болып табылады.
CISM жыл сайын әскерилер арасында спорттың әр түрінен жиырмадан астам әлем чемпионаттарын өткізіп тұрады. Оған әр төрт жыл сайын өткізілетін Бүкіләлемдік жазғы және қысқы армиялық ойындарды қосыңыз.
1-ші жазғы Бүкіләлемдік Армиялық ойындар 1995 жылғы қыркүйек айында Римде өткізілді. Бұл байрақты дода екінші дүниежүзілік соғыстың аяқталғанына 50 жыл толуына арналды. Осы сайыста әлемнің 93 елінен қатысқан командалар спорттың 17 түрінен өнер көрсетті. 103 адамнан тұратын Қазақстан Қарулы Күштерінің құрама командасы спорттың 12 түрінен жазғы ойындарға қатысқан болатын. Біздің спортшылар сол жолы 1 алтын, 3 қола медальді иеленген еді. Жалпыкомандалық есеп бойынша 83 елдің арасынан 18 орын алды.
2010 жылы СISM чемпионатында Қазақстан Қарулы Күштерінің командасы баскетболдан VII, еркін күрестен жалпыкомандалық есеп бойынша V орын алды. Бокстан былтыр өткен Әлем чемпионатында біздің жігіттер командалық I орынды еншілеп, барлығы 9 медальді қанжығаға байлаған болатын. Оның - екеуі алтын, үшеуі күміс, төртеуі қола.
Бразилияда өтетін 5-бүкіләлемдік Армия ойындарына қатысатын Қазақстан Қарулы Күштері құрамасында елімізге танымал спортшылар өнер көрсетеді.
Армиялық спортшылардың бірқатары 2012 жылы Лондонда өтетін Олимпиадалық ойындарға қазірдің өзінде жолдама алып үлгірді.
