Қазақстандық баскетболшылар әлем чемпионатының жолдамасына таласады
АСТАНА. ҚазАқпарат - 29 маусым мен 2 шілде аралығында баскетболдан Қазақстан ұлттық құрамасы 2019 жылғы әлем чемпионатына Азия аймағындағы іріктеу кезеңі аясында сырт алаңда екі матч өткізеді, деп хабарлайды ҚазАқпарат тілшісі.
ҚР ҰОК-нің баспасөз қызметі таратқан мәліметтерге сүйенсек, отандастарымыз 29 маусым күні Ирак құрамасына қарсы кездесу өткізбек. Бүгінде Ирак турнирдің ең соңғы сатысында келе жатыр. Кездесу Астана уақытымен сағат 23:00-де өтеді.
2 шілде күні қазақстандық баскетболшылар Иран құрамасынан қарымта қайтаруға тырысады. Ирандықтар Астанада өткен бәсекеде 75:54 есебімен Қазақстан құрамасын жеңіп кеткен болатын.
Тегеранда өтетін кездесулер Қазақстан мен Иранға екінші раундтағы ұпайларын еселеуге мүмкіндік бермек.
