Қазақстандық боксшы Олжас Сәттібаев Азия чемпионатының ширек финалына шықты

АСТАНА. ҚазАқпарат - 52 келіге дейінгі салмақ дәрежесінде өнер көрсететін Қазақстан чемпионы Олжас Сәттібаев Азия чемпионатын сәтті бастады.

Ол Таиландтың мықты боксшысы Онгжунта Тэйнспен кездесті, деп хабарлады Қазақстан бокс федерациясының баспасөз қызметінен.

Жекпе-жектің бірінші минутынан-ақ тай боксшысы Сәттібаевты өз соққыларымен әлсіретпек болды. Алайда ойын жүзеге асыра алмады. Олжас қарсыластың күш алуына бой бермеді. Ұтымды сәттерді қалт жібермей, қарсы шабуылдады.

Төрешілердің барлығы жеңісті жерлесімізге берді - 3:0. Осылайша 2014 жылғы Қазақстан чемпионы құрлықаралық турнирдің ширек финалына жолдама алды. фото - Александр Канивец