Қазақстандық суретшілер өз туындыларын Мәскеу көрмесінде таныстырды
МӘСКЕУ. Наурыздың 22-сі. ҚазАқпарат /Нарымбек Ысмағұлов/ - Мәскеу халықаралық көркемсурет салонында ашылған «Суретшілердің орталық үйі-2010» көрмесіне қазақстандық үш суретшінің туындылары қойылды.
ТМД елдерінің Гуманитарлық ынтымақтастық мемлекетаралық қорының қолдауымен ұйымдастырылған салон, ТМД және Балтық елдерінің суретшілер одақтарының өкілдерін таныстыру мақсатында осымен 13-ші рет өткізілуде.
Қазақстанның атынан көрмеге Нұрлан Бажыров («Арқан тарту, «Бөрілер», «Аударыспақ»), Дулат Әлиев («Ғашықтар», «Құрбылар»), Қадырбек Кәметов («Сұңқар салу», «Көкпар») сынды танымал суретшілердің туындылары қойылып отыр.
Салонға, сондай-ақ, Әзірбайжан, Армения, Беларус, Қырғызстан, Молдова, Ресей, Тәжікстан, Түрікменстан, Өзбекстан, Украина елдерінің, сондай-ақ Мәскеу, Санкт-Петербор және Киевтің суретшілер одақтары, Ресей суретшілерінің шығармашылық одағы, Ресей Көркемсурет академиясы, Латвия, Литва және Эстония суретшілерінің одақтары қатысуда.
