Қазақстандық теннисші Г.Воскобоева Rogers Cup 2011 халықаралық турнирінің ширек финалында сүрінді
АСТАНА. 15 тамыз. ҚазАқпарат - Қазақстандық теннисші Галина Воскобоева Канаданың Торонто қаласында өтіп жатқан жүлде қоры 2 миллион доллардан асатын Rogers Cup 2011 халықаралық турнирінің ширек финалында ұтылып қалды.
Бұл ақпаратты ҚР Теннис федерациясының баспасөз қызметінен хабарлады.
Ширек финалдық ойында Г.Воскобоева 2 сетте 6:1, 6:2 есебімен беларусь теннисшісі Виктория Азаренкоға есе жіберді.
Естеріңізге сала кетейік, алғашқы айналымда қазақстандық теннисші әлемнің үздік 10 теннисшісі қатарына кіретін француз Марион Бартолиді 6:3, 6:3 есебімен жеңген болатын. Екінші айналымда итальяндық Флавия Пеннеттамен қарсылас болған қазақстандық спортшы бірінші сетте 2:6 есебімен ұтылып қалған еді. Дегенмен екінші сетте жинақылық танытқан Г.Воскобоева қарсыласын 6:3 есебімен тізе бүктірді. Соңғы сәт те біздің спортшының айқын басымдылығымен аяқталды, есеп 6:2. Ал қазақстандық теннисші үшінші айналымда ресейлік теннисші, әлемнің 5-ші ракеткасы Марина Шарпованы 6:3, 7:5 есебімен ұтқан болатын.
