Қазақстандық теннисші Мексикадағы турнирдің жартылай финалына шықты
НҰР-СҰЛТАН. ҚазАқпарат – Қазақстандық Григорий Ломакин жұптық сында Мехико (Мексика) челленджер турнирінің жартылай финалына шықты, деп хабарлайды ҚазАқпарат тілшісі.
Теміртау қаласының түлегі ресейлік Евгений Донскоймен бірге бастапқы кездесуінде швейцариялық Якуб Пауль – аргентиналық Хуан Игнасио Лондероны 6:2, 6:2 есебімен ұтты.
Қазақстандық-ресейлік жұп ширек финалда жарыстың 1-ракеткалары, колумбиялық Николас Баррьентос – мексикалық Мигель-Анхель Рейес-Вареламен күш сынасты.
Бірінші партияда колумбиялық-мексикалық жұп 6:1 есебімен айқын басымдылық көрсетсе, екіншісінде Ломакин мен Донской есе қайырды – 6:4. Содан кейін тай-брейкте жеңісті жұлып алды – 10:6.
Бір сағат 18 минутқа созылған матчта Григорий мен Евгений 5 эйс жасап, 4 брейк-пойнттың тең жартысын мүлт жібермеді. Қарсыластары 2 эйс, 3 брейкпен (4 брейк-пойнт) көзге түсті.
Г.Ломакин мен Е.Донской финалға шығу үшін чилилік Николас Харри – бразилиялық Матеус Пучинелли де Алмейдамен таласады.
Еске сала кетейік, бұдан бұрын Қазақстан жасөспірімдер құрамасының Аустралияға жол бергенін, Александр Недовесовтің Мароккодағы турнирдің жартылай финалына шыққанын жазған болатынбыз.
Сондай-ақ Андрей Голубев Мароккодағы турнирдің жартылай финалында.
