Қазақстандық теннисшілер Брисбендегі халықаралық теннис турнирін ерте аяқтауға мәжбүр болды

АЛМАТЫ. 4 қаңтар. ҚазАқпарат /Ерлік Ержанұлы/ - Австралияның Брисбен қаласында өтір жатқан WTA және АTР сериясындағы  халықаралық турнирінде қазақстандық Галина Воскобоева 2007 жылғы нәтижесін қайталай алмады.

  5 жыл бұрын   ол Ивета Бенешовамен  бірге жұптық сайыста  екінші орын алған болатын. Бұл жолы  қытайлық  Су-Вей Хсимен жұп құрған ол 1/8 финалға дейін ғана жетті. Олар грекиялық Элени Данилиди мен словениялық Полона Херцогқа 5:7, 6:3, 4:10 есебімен есе жіберді.

Галина жекелей сында да 1/8 финалдан өте алмады. Ресейлік Вера Душевинаны (6:0, 6:0) ойсырата ұтқан оның жолын итальяндық Франческа Скьявоне (4:6, 4:6) кесті.  Бұл спортшы бұған дейін жарысты негізгі кестеден бастаған  қазақстандық тағы бір  теннисші Ксения Первакты жарыс жолынан шығарып тастаған болатын.  Турнирде іріктеу кезеңінен бастаған  Сесиль Каратанчева   қытайлық  Чен Кай Чангтан (6:4, 6:2) басым түскенімен грузиялық Анна Татишвилиге (6:7, 6;4, 6:7) есе жіберді.  Ерлер арасында бақ сынаған Михайл Кукушкин болса  алғашқы іріктеу сынында  ағылшын  Энди Маррейден (5:7, 6:3, 6:2 ) айласын асыра алмады.