Қазақстандық теннисшілер Швейцариядағы турнирдің жартылай финалына шықты
АСТАНА. ҚазАқпарат – Қазақстанның жұптық сындағы мықтылары Александр Недовесов пен Андрей Голубев Базель (Швейцария) ATP 500 турнирінің жартылай финалына шықты, деп хабарлайды ҚазАқпарат тілшісі.
Қазақстандық жұп ширек финалда бразилиялық Рафаэль Матос – испаниялық Давид Вега Эрнандеспен күш сынасты.
А.Голубев пен А.Недовесов қарсыластарынан 7:5, 6:3 есебімен басым түсті.
Сағат жарымға жуық уақытқа созылған матч барысында қазақстандықтар 7 эйс жасап, 12 брейк-пойнттың үшеуін пайдаланды.
Андрей Голубев пен Александр Недовесов финалға шығу үшін хорватиялық Иван Додиг – америкалық Остин Крайчекпен таласады. Бұл жұп ширек финалда жарыстың бірінші ракеткалары, сальвадорлық Марсело Аревало – нидерландылық Жан-Жюльен Ройерді қапы қалдырды – 6:4, 6:3.
Тағы бір қазақстандық, рейтингте 331-орында тұрған Бейбіт Жукаев Брест (Франция) челленджер турнирінің ширек финалына өте алмай қалды. Ол екінші айналымда әлемнің 110-ракеткасы, франциялық Грегуар Баррерден жеңіліс тапты – 2:6, 4:6.
Еске сала кетейік, бұдан бұрын қазақстандық теннисшілердің Швейцариядағы жарыстың ширек финалына шыққанын жазған болатынбыз.
Сондай-ақ қазақстандық екі жас теннисші әлемдегі үздік 100 ойыншының қатарына кірді.
Александр Бублик жекелей сында Швейцариядағы турнирдің ширек финалына өтті.
Фото: sports.kz
