Қазақстандық жас маманды Google компаниясы жұмысқа шақырды
АСТАНА. ҚазАқпарат - Әли Жүсіпов Еуразия ұлттық университетінің механика-математика факультетін математикалық және компьютерлік модельдеу мамандығы бойынша тәмамдаған, деп хабарлайды ҚазАқпарат.
Ол Google компаниясынан шақыру алып, биылғы қыркүйек айынан бастап Цюрихтегі кеңсесінде бағдарламашы-құрастырушы болып жұмыс істеп жатыр.
Әли бұған дейін Яндексте тағылымдамадан өтіп, сонымен қатар «Сбер» компаниясында бағдарламашы-әзірлеуші ретінде еңбектеніп үлгерді.
Дарынды студент ЕҰУ-да оқыған жылдары бағдарламалау саласы бойынша көптеген халықаралық олимпиада мен жарыстарда жеңімпаз атанып, сондай-ақ шахмат пен баскетболға әуес болды.
Бүгінде ЕҰУ түлектерінің көпшілігі отандық және шетелдік IT-компанияларда табысты еңбек етіп жүр.
ЕҰУ механика-математика факультеті бакалавриат, магистратура және докторантура бойынша 15 білім бағдарламасы аясында жоғары білікті мамандарды даярлайды.
