Қазақстандықтар жағажай волейболынан «Гранд Слэм» әлемдік турының Голландиядағы кезеңінде үздік ондыққа енді
АЛМАТЫ. 16 маусым. ҚазАқпарат - Голландияның Гаага қаласында жағажай волейболынан «Гранд Слэм» әлемдік турының «The Hague Grand Slam» кезеңдік жарысы өтіп жатыр.
11 маусым күні басталған бұл додада өз тобында үздік шыққан Алексей Сидоренко мен Александр Дьяченко жұбы 1/8 финалда австралиялықтарға есе жіберді. Соның нәтижесінде 9-шы орын алып, рейтингтік қоржынын 400 ұпаймен толықтырды. Бұған дейін Дмитрий Яковлев пен Алексей Кулешов дәрежелік 1-ші раундта итальяндықтарға ұтылып, 41-ші орын мен рейтингтік 80 ұпайды қанағат тұтқан болатын. Ал 2-ші раундта голландиялықтарға 1:2 есебімен жеңілген Татьяна Машкова мен Ирина Цимбалова 33-ші орынды иеленіп, өз қоржынына 160 ұпай қосқан еді.Енді олар 18-23 маусым күндері - Италияда, 1-6 шілдеде - Польшада болатын «Гранд Слэм» Әлемдік турының келесі кезеңдік жарыстарында бақ сынайтын болады.
