Қазақстандықтардың коммуналдық қарызы 7 млрд. теңгеге жетті - Елбасы
АСТАНА. 28 қараша. ҚазАқпарат - Елбасы қазақстандықтардың коммуналдық қарызының 7 млрд. теңгеге жетуіне алаңдаушылық танытты. Бұл туралы бүгін Ақордада барлық деңгейдегі әкімдердің қатысуымен өткен жиынның қорытындысына орай ұйымдастырылған брифингте ҚР Президентінің баспасөз хатшысы Дәурен Абаев мәлім етті.
Оның атап өтуінше, Президент өңір басшыларының коммуналдық қызмет қарыздарын төмендету бойынша тапсырманы бақылауға алмай отырғандықтарын сынға алды. Елбасының алға тартқан дерегіне сәйкес, бүгінде қазақстандықтардың аталған қарызы шамамен 7 млрд. теңгені құрап отыр.
Сонымен қатар Мемлекет басшысы тарифтердің жыл сайынғы өсімі де бақылауға алынбайтындығын атап өтті. «Президент нақты мысал келтірді: Павлодар облысында энергостанса тарифті 1,5 есе көтерді, ал ол жақта тозу да өсіп келеді. Ал Көкшетауда жергілікті монополистің 4 млрд. теңгелік инвестициялық бағдарламасы электр желілеріндегі шығынды тек 1 пайызға ғана төмендетеді», - деді Д.Абаев.
