Қазақстанға көшіп келген Жолтай мен Иванбек қазақ тілін қалай тез үйренді

АСТАНА. KAZINFORM – Қазақстанда Жолтай есімді АҚШ азаматы тұрады. Лос-Анджелесте туған экспаттың шын есімі – Жоел Адомсон. Басынан тақиясын тастамайтын ол Jibek Joly арнасының «Бүгін LIVE» бағдарламасына сұхбат берді. 

– Қазақстанға алғаш рет келгенімде қазақтарға менің атымды айту қиын болды. Тілі келмеген соң қазақ досым «Сені Жолтай деп атаймын» деді. Содан бері мен өзімді Жолтай деп таныстырамын, - дейді Жоел Адомсон.

Ол елімізге 1990 жылы көшіп келген. Содан бері бірнеше қалада жұмыс істеп үлгерген.

– Менің әйелім – эстон ұлтынан. Ол өзінің шыққан тегін жетік білгісі келді. Бірақ ол кезде америкалықтарға КСРО-ға кіру өте қиын болды. Виза бермейтін. Сол жылы Қазақстанда 1 жыл қазақ тілін үйрену үшін даярлық курсы ашылды. Біз сол мүмкіндікті пайдаландық. Алғашында 1 жыл оқып, АҚШ-қа қайтамыз деп ойлағанбыз. Бірақ бізге осында жұмыс істеуге ұсыныс жасады. Қазақстанда Алматы, Атырау қалаларында жұмыс істедім. Кейін біраз жыл Ресейде тұрдым. Онда жүріп ауырып қалған соң, ем алу үшін Америкаға қайтуыма тура келді. Жазылған соң Қазақстанға қайта келдім, - дейді ол. 

Америкалық Жолтай қазақ тілін қалай үйренгенін айтып берді. 

– Мен мұнда келгенде қазақша мүлде білмедім. Бәрін жаңадан бастадым. Бір жылда тілді толық меңгере алмаған соң, екінші жылы жұбайымыз екеуміз жеке мұғалім жалдап оқуымызды жалғастырдық. Бізге орыс тіліне қарағанда қазақ тілін үйрену оңай болды. Қазір орысша жақсы білмейміз. Себебі біз үшін орыс тілінің грамматикасы өте қиын. Және екі тілді бірден терең үйрену бізге қиын болды. Сол үшін біз қазақ тілін таңдадық. Атырауда тұрғанымызда балаларымызды қазақ мектебіне бердік. Олар қазақша қарапайым тұрғындар секілді судай сөйлейтін. Бірақ кейін Ресейге, Ресейден АҚШ-қа көштік. 20 жылда олар тілді ұмытып қалды, - дейді АҚШ азаматы. 

Америкада туып, қазақ мәдениетімен етене танысқан Жоел Адомсон екі елдің айырмашылығына да тоқталды.

– Қазақтар «бес саусақ бірдей емес» дейді ғой. Сол секілді екі елдің айырмашылықтары көп. Маған қазақ елінің отбасылық құндылықтарды бірінші орынға қоятыны ұнайды. Оған қоса бауырмалдығы мен қонақжайлығы бар. Америкадағы адамдар тек өзін ғана ойлайды. Сондай-ақ қазақтардың өз тілінде бата беретіні маған ерекше әсер етеді. Мен осыдан бір ай бұрын Мальдив аралдарына бардым. Олар да мұсылман мемлекеті ғой. Ондағы тұрғындардан тамақтанып болған соң «бата бересіңдер ме» деп әдейі сұрадым. Олар «жоқ, біз олай істемейміз» деді. Мен таңғалдым. Мен мұсылмандардың бәрі осылай өз тілдерінде бата береді деп ойлаған едім, - дейді Жоел.

АҚШ азаматы сүбелі сұхбатын бата беріп түйіндеді. 

– Алла Тағала, бізге деген жақсылығың мен мейірімің үшін алғыс айтамыз. Біздің жүрген жолдарымыз өзіңе ұнамды болсын. Сенімімізді нығайтып, бізді жетелей көр. Тәңір Ием, барлық уақытта даналық пен парасаттылық бере көр. Осы бағдарламаға және Қазақ еліне амандық бере гөр, - деді студия қонағы.

Қазақстанға өзге мемлекеттен көшіп келгендердің бірі – Иван Червинский. Ол – ресейлік азамат. Бұған дейін Түркияға да қоныстанып көрген. Алайда 2 жылдан бері Алматыда тұрады. 

– Менің атым – Иван. Қазақша есімім – Иванбек. Қазақстанға түпкілікті қоныс аударғаныма жуырда 2 жыл болады. Бірақ 8 жылдан бері Алматыға келіп-кетіп жүрмін. Қазақтар – өте адал. Ал Қазақстан қонақжайлылық жағынан әлемде бірінші орын алады. Өзім туралы айтар болсам, мен – блогермін. Қазіргі кезде Қазақстан туралы тек қана жағымды жаңалық айтып, көпшіліктен сүйінші сұрап жүрмін, - дейді Иван. 

«Бүгін LIVE» бағдарламасына онлайн сұхбат берген кейіпкеріміз балаларына да қазақ тілін үйрететінін айтты. 

– Қазір отбасым Санкт-Петерборда. Әйелім аллергиясына байланысты сол жаққа қайтуға тура келді. Бірақ осында келгенде қызымды қазақ мектебіне, ұлымды қазақ балабақшасына бердім, - дейді ол. 

Бүгінде Иван Jibek Joly арнасындағы «Дәмді дода» жобасының қатысушысы екенін айта кетейік. 

– Жобадағы ең дәмді дайындаған асым – қазақша ет. Жалпы, қазақ асханасында дәмді тағамдар өте көп. Маған қатты ұнайтын тамақтар – ет, қуырдақ, сірне, бауырсақ, қымыз. Қазақ асханасы басқа елдерге қарағанда өте ерекше. Себебі бұл асханада бәрі бар. Қазақ асханасы, қазақ әуендері және қазақ тілі – Қазақстанның ең басты байлығы. Шетел азаматтарын таңғалдырады. Мәселен, басқалар үшін жылқы етін жеу – таңғаларлық жағдай. Шынында жылқы еті жай ғана дәмді емес, ол өте пайдалы. Себебі онда холестерин аз және адамға күш береді, - дейді кейіпкеріміз.

Айта кетейік, өткен айда еліміз Ынтымақ күнін атап өткен еді.