Қазақстанның борыш жүктемесі 5 жыл бұрынғыдан әлдеқайда жеңілдеді – Ұлттық банк
АСТАНА. KAZINFORM – Ұлттық банк төрағасы Тимур Сүлейменов Қазақстанның сыртқы қарызы 170,5 млрд долларға жетуі туралы пікір білдірді.
Ұлттық банк басшысы аталған соманың басым бөлігі Қазақстан аумағында жұмыс істейтін шетелдік инвесторлардың өз еліндегі бас кеңселері алдындағы борышы құрайтынын еске салды. Сондай-ақ, ол мемлекеттік қарыздың көлемінен бұрын оның жалпы ішкі өнімге пайызбен шаққандағы қатысы маңызды екенін айтты.
– 2018, 2019 жылдарды алсақ, сыртқы қарыздың көлемі 160-170 млрд доллардың төңірегінде болған еді. Шамамен қазіргідей деңгейде болатын. Бірақ ол кезде ЖІӨ көлемі де 170 доллар болатын. Демек сыртқы қарыздың ЖІӨ-ге қатысы 110–120% болды. Қазір мемлекеттік борышымыздың ЖІӨ-дегі деңгейі 57-58% болып отыр. Яғни, борыш жүктемесі соңғы 5 жылда әлдеқайда жеңілдеді, - деді Тимур Сүлейменов.
Айтуынша, мұндай оң тенденцияға экономиканың өсуі мен кейбір сыртқы міндеттемелерді қайта қарау шарасы жол ашып отыр.
Еске салайық, бүгін Ұлттық банк базалық мөлшерлемені тағы өзгеріссіз қалдырды.
