Қазақстанның Азиялық Парламенттік Ассамблеясының мүшелігіне қабылдануы туралы мәселе қаралады
АСТАНА. Желтоқсанның 4-і. ҚазАқпарат - Бүгін ҚР Парламенті Мәжілісінің депутаттары Кенжеғали Сағадиев пен Зейнолла Алшымбаев Индонезия елінің Бандунг қаласына аттанады. Қазақстан парламентшілері Бандунг қаласында өтетін Азиялық Парламенттік Ассамблеясының (АПА) IV жалпы сессиясының жұмысына қатысады,
деп хабарлайды ҚазАқпарат.
Айта кету керек, Азиялық Парламенттік Ассамблеясы 1999 жылы Бангладештің бастамасымен Азия елдері парламенттерінің «Бейбітшілік және ынтымақтастық үшін» атты конференциясында құрылды. Азиялық Парламенттік Ассамблеясына 39 елдің парламенттері мүшелікте болса, оның құрамында Ресей, Қырғызстан, Тәжікстан және Өзбекстан елдері де бар. Ал 18 ел бақылаушы мәртебесіне ие, соның ішіне Қазақстан да кіреді.
Осы жолғы басқосудың күн тәртібінде Қазақстан мен Индияны мүшелікке қабылдау мәселесі қарастырылады деп күтілуде.
