Қазақстанның барлық облыстарында дағдарыс орталықтары ашылады - В. Божко
АСТАНА. 30 қыркүйек. ҚазАқпарат - Қазақстанның барлық облыстарында төтенше жағдайлар бойынша дағдарыс орталықтары ашылады. Бұл туралы бүгін Астанада өткен төтенше жағдайларды ғарыштан бақылау және болжау бойынша бірлескен жүйені құру жөніндегі Қазақстан - Ресей жұмыс тобының кезекті отырысында ҚР Төтенше жағдайлар министрі Владимир Божко мәлім етті.
«Алдағы уақытта біз республиканың әрбір облысында дағдарыс орталықтарын ашатын боламыз. Осы мәселе бойынша тиісті бағдарлама мен қажетті құжаттар рәсімделген. Келесі жылға ел бюджетінен қаржы да бөлінді», - дейді В. Божко.
Айта кетейік, төтенше жағдайлар бойынша дағдарыс орталықтары табиғи және техногендік сипаттағы апаттар туралы ақпаратты сараптап, тиісті органдардың шұғыл түрде әрекет етуін қамтамасыз етеді.
