Қазақстанның халықаралық резервтері 0,5% өсті - ҚР Ұлттық банкі
АЛМАТЫ. ҚазАқпарат - 2015 жылғы маусымның аяғында Ұлттық банктің жалпы халықаралық резервтері 2015 жылғы мамырмен салыстырғанда 0,5%-ға ұлғайды және 28,9 млрд. АҚШ доллары болды. Ал Ұлттық банктің таза халықаралық резервтері 2015 жылғы мамырмен салыстырғанда 0,5%-ға ұлғайды және 28,1 млрд. АҚШ долларын құрады, деп хабарлайды ҚР Ұлттық банкінің баспасөз қызметі.
Елдің халықаралық резервтері, жалпы алғанда Ұлттық қордың шетел валютасындағы активтерін (69,0 млрд. АҚШ доллары) қоса алғанда, 2015 жылғы мамырмен салыстырғанда 97,9 млрд. АҚШ долларына дейін, яғни 0,2%-ға ұлғайды. 2015 жылғы маусымда ақша базасы 15,0%-ға кеңейіп, 4191,2 млрд. теңге болды (жыл басынан бері 22,8%-ға кеңейді). Тар ақша базасы, яғни екінші деңгейдегі банктердің Ұлттық банктегі мерзімді депозиттерін есептемегендегі ақша базасы 3877,9 млрд. теңгеге дейін, 11,1%-ға кеңейді. «2015 жылғы мамырда ақша массасы 12533,8 млрд. теңгеге дейін - 2,2%-ға, айналыстағы қолма-қол ақша - 1086,9 млрд. теңгеге дейін, 6,7%-ға, банк жүйесіндегі депозиттер - 11446,9 млрд. теңгеге дейін, яғни 1,8%-ға ұлғайды. Ақша массасының құрылымындағы депозиттердің үлесі 2014 жылғы желтоқсандағы 91,2%-дан, 2015 жылғы мамырда 91,3%-ға дейін өсті. Бұған айналыстағы қолма-қол ақша көлемінің азаюы себеп болып жатыр. Ал 2015 жылғы мамырдың соңында ақша мультипликаторы 3,44 болды», делінген ҚР Ұлттық банкінің таратқан мәліметінде.
