Қазақстанның телеарналары әлемдік стандарттар деңгейінде жұмыс істейтін болады
АСТАНА. 20 маусым. ҚазАқпарат - Бүгін Астанада Қазақстан Республикасы Президенті Әкімшілігі Басшысының орынбасары Бағлан Майлыбаев «Қазмедиа орталығы» телерадиокешені мен мемлекеттік республикалық телеарналар жетекшілерімен кездесу өткізді.
Кездесу барысында телеарналардың Телерадиокешен ғимаратына қоныс аудару кестесін жүзеге асыру және олардың материалдық-техникалық ресурстарының дайындығы мәселелері талқыланды.
Телерадиокешенге «Хабар агенттігі» АҚ, «Қазақстан» РТРК», «Мир» ХТРК мен «Еуразия+ОРТ» телекомпаниясы орналасатын болады. Сондай-ақ, Телерадиокешен базасында үстіміздегі жылы «Білім» және «Новости 24» екі жаңа арна шығару жоспарланған.
Телерадиокешен мемлекеттік тарату компаниялары үшін басты технологиялық алаң болады және сапалы әрі бәсекеге қабілетті медиаконтент өндірісіне деген барлық ағымдағы және келешектегі сұранысты қанағаттандырады.
«Қазмедиа орталығы» телерадиокешені Мемлекет басшысының тапсырмасы бойынша салынған.
Кешен керемет мультимедиалық жоба болып табылады. Оған жаңалықтар, ток-шоу, сериалдар түсіру, дыбыс жазу, дубляж жасау, радио тарату жұмыстарын дайындау үшін 24 студия орналастырылады. Орнатылған жабдықтар микрофондарды, камераларды, монтаждау пульттерін, жарықтандыруды, дыбыс жүйелерін, т.б. қоса алғанда толықтай жинақталған технологиялық желі болып табылады.
ТРК-нің жоғары сыныпты техникалық жарақтандырылуы оны тек Орталық Азия және ТМД елдері ғана емес, сонымен қатар әлемдегі де ең жетекші жабдықтар қатарына жатқызуға мүмкіндік береді.
Қазіргі кезде мұнда құрал-жабдықтарды дайындау мен телеарналар персоналын әлемдегі ең заманауи телекоммуникациялық және телевизиялық жабдықтарда жұмыс істеуге оқытып, үйрету үдерістері аяқталып келеді.
