Қазақстанның жарқын болашағы үшін әрбір азаматтың пікірі өте маңызды - Мемлекет басшысы
НҰР-СҰЛТАН. ҚазАқпарат - Саяси бәсекеде біздің халқымыздың даналығы, парасаты жеңді. Бұл туралы Тәуелсіздік сарайындағы ұлықтау рәсімінде Қазақстан Президенті Қасым-Жомарт Тоқаев мәлім етті, деп хабарлайды ҚазАқпарат тілшісі.
Президент өткен сайлау саяси бағдарламалар сайысқа түскен әділ дода болғанын атап өтті.
«Осы өте маңызды саяси бәсекеде біздің халқымыздың даналығы, парасаты жеңді. Сондықтан бұл жеңіс - халқымыздың жеңісі!», - деді Мемлекет басшысы.
«Біз бір ел болып, халық болып, Қазақстанның алдағы даму жолын бірге айқындадық. 9 маусымда Қазақстанның жарқын болашағы үшін дауыс берген әрбір азаматтың пікірі - біз үшін өте маңызды! Өйткені6 халқымыздың татулығы, ынтымағы, бірлігі - біздің ең басты құндылығымыз. Осы құндылықты көздің қарашығындай сақтау - баршамызға ортақ парыз», - деді Қ. Тоқаев.
