Қазанда еліміздегі инфляция 0,9 пайызды құрады
АСТАНА. 1 қараша. ҚазАқпарат - Ағымдағы жылдың қазан айында Қазақстан Республикасындағы инфляция 0,9 пайызды құрады. Бұл ақпаратты ҚР Статистика агенттігінің баспасөз қызметі хабарлап отыр.
Ведомствоның атап өтуінше, өткен айда азық-түлік тауарларына баға 1,3, азық-түлік емес тауарларына - 0,6, ақылы қызмет көрсетулерге - 0,7 пайызға өскен.
Өткен айда бағаның өсуі нан және жарма өнімдеріне 2,2, ал қарақұмық жармасына - 12,8, ұнға - 4, сөкке - 2,6, нанға - 2,3, макарон өнімдеріне - 2 пайыз көлемінде белгіленді. Сонымен қатар баға жұмыртқаға 6,2, май және тоңмайға - 3,4, жаңа сауылған сүтке - 2,4, қантқа - 1,6, жемістер мен көкөністерге - 1,5, ет өнімдеріне - 0,6 пайызға жоғарылады.
Бағаның өсуі сұйытылған газға 2,5, қатты отынға - 1,5, шыны және қыш бұйымдарға - 0,9, киім мен аяқ киімге - 0,5, фармацевтика препараттарына - 0,3 пайызды құрады. Бензин 1,5, дизель отыны - 2,9 пайызға қымбаттады.
Амбулаториялық қызметтер 1,8, жоғары білім беру қызметтері - 1, мейрамханалар мен қонақ үйлердің қызметтері - 0,9, көлік қызметтері - 0,8, мәдениет қызметтері - 0,5 пайызға арттып отыр.
Тұрғын үй коммуналдық қызмет көрсетулер саласында тарифтер бөлінетін желілер бойынша тасымалданатын газға 2,6, орталықтан жылытуға - 1,7, ыстық суға - 0,6, электр энергияға - 0,2 пайызға артты.
