Қазгидромет: 2 маусымда Қазақстанның батысы мен шығысында найзағай аралас жаңбыр жауады, республиканың орталығында күн қатты ысиды
АСТАНА. 1 маусым. ҚазАқпарат - Қазақстан Республикасының Қоршаған ортаны қорғау министрлігінің «Қазгидромет» РМК болжауынша, 2 маусымда Қазақстанның басым аумағында күн райы жауын-шашынсыз болады деп күтілуде,
республиканың батысы мен шығысында найзағай аралас өткінші жаңбыр жауады.
Алматы, Шығыс Қазақстан, күндіз Атырау, Батыс Қазақстан, Ақтөбе және Қостанай облыстарының жекелеген жерлерінде 15-20 м/с жылдамдықпен жел соғады.
Күндіз және түнде Маңғыстау облысының Каспийге қарасты жағалауында тұман болады, желдің екпіні 15-20 м/с - қа дейін жетеді.
Ақтөбе, кей жерлерде Ақмола және Қарағанды облыстарында күн қатты ысиды деп күтілуде.
Қызылорда, жекелеген жерлерде Ақтөбе, Маңғыстау және Оңтүстік Қазақстан облыстарында төтенше жоғары өрт қаупі сақталады.
Алдағы 3 тәулікте республиканың оңтүстік, оңтүстік-шығыс және шығыс таулы өзендерінде су деңгейінің ауытқушылығы байқалады.
