«ҚазМұнайГаз» «Доңға» жобасындағы 60% үлесті сатып алды
«ҚазМұнайГаз» ҰК АҚ (ҚМГ) «TotalEnergies EP Danmark A/S» компаниясынан (TotalEnergies еншілес ұйымы) «Total E&P Dunga GmbH» жарғылық капиталындағы 100% акциясын сатып алғаны жөнінде мәлімдеді. Кazinform бұл туралы ҚМГ сайтына сілтеме жасап хабарлайды.
Осылайша, ҚМГ «Доңға» жер қойнауын пайдалану жобасының 60 пайыз үлесіне иелік етеді.
Аталған мәміле бұған дейін ҚМГ мен «TotalEnergies EP Danmark A/S» арасында қабылданған сатып алу-сату келісімшартының аясында жасалды.
Айта кетейік, «Доңға» мұнай-газ кен орны Маңғыстау облысы Түпқараған ауданында орналасқан. Кен орын 1966 жылы ашылған. «Доңға» жобасы өнімді бөлу туралы шарт аясында іске асырылып келеді. Шарттың қазіргі қатысушылары — «Total E&P Dunga GmbH» (60%), «Oman Oil Company Limited» (20%) және «PTT Exploration and Production» (20%).
TotalEnergies – мұнай және биоотын, табиғи газ бен жасыл газдар, жаңартылатын энергия мен электр энергиясын өндіретін, сататын жаһандық мультиэнергетикалық компания.
2002 жылы құрылған «ҚазМұнайГаз» ұлттық компаниясы» АҚ еліміздің мұнай-газ саласында Қазақстанның мүддесін қорғайды.
