ҚазҰУ-да Әл-Фараби алаңы ашылды
АСТАНА. ҚазАқпарат - Қазақ Ұлттық Университетінде Әл-Фараби алаңы ашылды. Бұл салтанатты шара Қазақстан Республикасының 25-жылдық Тәуелсіздігіне арналды, деп хабарлайды ҚазАқпарат университеттің баспасөз қызметіне сілтеме жасап.
Алаңның тұсаукесер рәсіміне университет студенттері, қызметкерлері мен оқытушылары қатысты. Басты сөзді алған ҚазҰУ ректоры, академик Ғалым Мұтанов бұл шара жаңа оқу жылының басында ҚазҰУ-дың кампусында ашылған студенттер мен түлектердің триумфалды аркасының жалғасы болып табылатындығын атап өтті.
Сәулеттік архитектуралық идея бойынша қаланыӊ айшықты белгісіне айналған Триумфалды қақпасынан кейінгі тура жол Әл-Фараби алаңына әкеледі. Төрт жақтан жарқыраған алаң ғылым мен білімге құштар жастардың символын білдіреді.
ҚазҰУ басшылығы мен ұжымы барша қауымды Қазақстан Тәуелсіздігінің 25 жылдығымен және Әл-Фараби алаңының ашылуымен құттықтап, алда үлкен жетістіктер мен табыстарға жетулеріне ізгі тілектерін білідірді.
Ауқымды шара кеші ҚазҰУ-дың көркемөнерпаздары дайындаған концертімен аяқталды.
