Кеден одағына қатысушы елдерде кәсіпкерлікті субсидиялау пайыздары теңдестіріледі

Бұл туралы бүгін Астанада өткен баспасөз мәслихатында Ауыл шаруашылығы вице-министрі Сақташ Хасенов айтты.

«Бәсекелестікті барынша теңдестіру үшін, сондай-ақ әділ қадамдарды іске асыру тұрғысында барлық мемлекеттерде мемлекеттік қолдау шаралары, яғни субсидиялау көлемі бірте-бірте бірдей болады деген шешім жасалды. Атап айтқанда ол өнімнің жалпы құнының 10 пайызынан аспайтын болады»,- деді вице-министр.

Оның айтуынша, бүгінде Кеден одағы құрамындағы елдерде бұл пайыздық көрсеткіштер әртүрлі. Мәселен, Қазақстанда ауыл шаруашылығы өнімін субсидиялау - 3 пайызды, Ресейде 3 пайыздан астам, сондай-ақ Беларуста 18 пайыз төңірегіндегі көрсеткішті құрайды.

Беларус мемлекетінде ауыл шаруашылығы саласында субсидия көлемі жоғары екеніне тоқталған С. Хасенов, «сондықтан да бұл ел 5 жыл мерзімде осы саладағы субсидияны 18 пайыздан 10 пайызға дейін төмендету міндетін алып отыр»,- деді.