Келешек мектептері: Ақтауда 300 орындық білім ордасы ашылды
АҚТАУ. KAZINFORM — Бүгін Ақтау қаласында Мемлекет басшысының тапсырмасына сәйкес жүзеге асырылып жатқан «Келешек мектептері» ұлттық жобасы аясында жаңа заманауи мектеп пайдалануға берілді.
Өмірзақ ауылының «Рауан» тұрғын массивінде бой көтерген № 26 жалпы білім беретін мектеп 300 оқушыға арналған. Бұл — ауылдық аймақтарда білім сапасын арттыруға бағытталған ұлттық жобаның нақты нәтижесі.
— Ауыл — қазақтың бесігі. Өздеріңізге мәлім, қазақтың талай мықты ғалымы, ақыны, жазушысы, басқа да сан саланың нағыз мықтылары ауылдық елді мекендерден шықты. Бұл мектепте оқушылардың мықты білім алуына барлық мүмкіндік мемлекет тарапынан жасалып отыр. Жаңа мектеп құтты, білім күні оң болғай, — деді Ақтау қаласы әкімі Әбілқайыр Байпақов.
Жаңа мектеп заман талаптарына сай оқу кабинеттерімен, спорт және шығармашылық залдарымен, сондай-ақ инклюзивті білім беруге арналған арнайы кабинеттермен толық жабдықталған.
Бұған дейін елордада алғашқы қоңырау соғылғанын жазғанбыз.
