Келесі жылы Алматы көшелері 100% жарықпен қамтылады
АЛМАТЫ. ҚазАқпарат – Алматы көшелерін жарықтандыру деңгейі 71% құрайды, келесі жылға қарай бұл көрсеткішті 100% дейін жеткізу жоспарланып отыр, деп хабарлайды ҚазАқпарат тілшісі.
«Өткен жылы Алатау, Наурызбай, Түрксіб, Жетісу аудандарының 329 көшесіне жарық жүйесін орнату жұмыстары жүргізілді. Биыл коронавирус індеті мен карантиндік режимге байланысты бұл жұмыс белгіленген мерзімнен кештеу, яғни 1 шілдеден басталды. Бұл аудандарда 157 көшеге жарық жүйесін орнатамыз»,– деп жазды Алматы әкімінің баспасөз хатшысы Әсет Мұқажанов Instagram –дағы парақшасында.
Сонымен қатар, ол бүгінгі күні көшелердегі жарық жүйесінің деңгейі 71% –ды құрайтынын атап өтті.
«Жалпы көрсеткішті 100%-ға жеткізу үшін қаланың барлық аудандарының 2024 көшесіне жарық жүйесін орнату қажет. Бұл жұмысты келесі жылы аяқтауды жоспарлап отырмыз»,–деп жазды Әсет Мұқажанов.
