Кентауда қайта өңдеу зауыты іске қосылды

ШЫМКЕНТ. ҚазАқпарат - Қазақстан Республикасы Тәуелсіздігінің 25 жылдығына орай Оңтүстік Қазақстан облысының Кентау қаласында пластикалық қалдықтарды қайта өңдейтін жаңа кәсіпорын іске қосылды, деп хабарлайды облыс әкімдігінің баспасөз қызметі.

Жаңадан ашылған «Статус Эверест» ЖШС-нің салтанатты шарасына ҚР Инвестиция және даму министрлігі, көлік комитеті төрағасының орынбасары Қайриден Нүркенов, қала әкімі Әбдібақыт Мақұлбаев пен зиялы қауым өкілдері қатысты. 2014 жылы Кентау қаласындағы индустриалды аймақта құрылысы басталған өндірістік кәсіпорынның сметалық  жобасы 100 млн.  теңгені құрайды. Аталған зауыт пластикалық қатты қалдықтарды қайта өңдеп, кәдеге жарату үшін екінші реттік шикізаттық өнім дайындайды. Дайын шикізатты Қазақстан мен Ресей Федерациясының Челябі, Екатеринбор, Мәскеу, Самара қалаларына экспорттау жоспарланып отыр. Қазіргі таңда аталған кәсіпорында 25 адам жұмыс істейді. Сағатына 300-500 келі көлемінде пластикалық қатты қалдықтарды өңдеуге қауқарлы зауытта 1 айда 80-100 тонна қалдықтарды өңдеуді жоспарлап отыр.

Айта кету керек, Кентау қаласы облыстағы өндірісі өркендеген қала қатарына жатады. Мұнда трансформатор зауытынан өзге көптеген кәсіпорындар ашылып жатыр. Осы жолы ашылған қайта өңдеу зауыты ел экономикасының еселенуіне үлес қосатын болады.