Кешіктірілген төлемдерге айыппұл салынбайды – Ұлттық банк
НҰР-СҰЛТАН. ҚазАқпарат – Елдегі төтенше жағдайға байланысты уақытынан кешіктірілген төлемдер үшін айыппұл салынбайды, деп хабарлайды ҚазАқпарат «Хабар 24» телеарнасына сілтеме жасап.
Қазақстанда банктер дүйсенбіге дейін жұмыс істемейді. Бұл туралы аталған телеарнаға ҚР Ұлттық банкінің баспасөз хатшысы Олжас Рамазанов мәлім етті.
«Әзірге тек банкоматтар ғана халыққа қолжетімді. Ал кешіктірілген төлемдерге айыппұл салынбайды. Kaspi.kz, Halyk, Forte, Центр кредит, Алтын банк пен Home кредит өкілдері күні кеше осындай хабар таратқан еді. Бүгін бұлардың қатарына Альфа банк те қосылды. Олар қаңтардың 5-і мен 19-ы аралығында ипотекасын төлей алмағандарға өсімақы жүрмейді дейді», - деп хабарланды «Хабар 24»–тен.
Телеарнадан айтылғандай, аталған шешім елдегі жағдайға байланысты қабылданып отыр.
«Банктен қарыз алғандар алаңдамауына болады», - деп сендірді Ұлттық банк.
