Кейбір кәсіпкерлерге қатысты қылмыстық іс дереу тоқтатылуы мүмкін – заң жобасы
АСТАНА. KAZINFORM – Кейбір экономикалық баптарды қылмыстық сипаттан арылту аясында кәсіпкерлерге қатысты қылмыстық іс дереу тоқтатылады. Бұл туралы бүгін Мәжілістің жалпы отырысында тиісті заң жобасын талқылау кезінде депутат Абзал Құспан айтты.
Палата отырысында депутат Олжас Құспеков экономикалық құқық бұзушы әрекеттерді одан әрі қылмыстық сипаттан арылтуға қатысты сұрақ қойды.
«Қылмыстың кодекстің 4 бабы қылмыстық сипаттан арылтуға жатады. 2 бап толық алынып тасталады, 2 бап ішінара қылмыстық сипаттан арылады. Атап өтсек, «Кредитті заңсыз алу немесе бюджетті мақсатсыз пайдалану» - Қылмыстық кодекстің 219-бабы, Бухгалтерлік есеп пен қаржылық есептілік туралы заңнамасын бұзу - 241-бап, сондай-ақ экономикикалық контрабанда - 234-бап және кедендік баждарды, алымдарды, салықтарды арнайы демпингке қарсы өтемақы баждарын төлеуден жалтару - 236-бап. Осыған байланысты менің бірнеше сұрағым бар. Біріншісі - неге осы баптарды қылмыстық сипаттан арылту қажет деп есептедіңіз. Оларды қолдану тәжірибесі қандай? Екіншісі - сот шешімдері шығып қойған істерді қайтесіздер және мұндай кәсіпкерлердің тағдыры не болмақ?», - деп сұрады О. Құспеков.
Өз кезегінде депутат Абзал Құспан 2014 жылы Қылмыстық және Қылмыстық-процестік кодекс жаңадан қабылданғанын айтты.
«Одан кейін жаңа қабылданған қылмыстық кодексті тәжірибеде қолдану барысында бірқатар мәселе анықталып, 2017 жылдан бері жалпы экономикалық сипаттағы қылмыстық істерді декриминизациялау, яғни қылмыстық сипаттан арылту жұмыстары басталды. Сол уақыттан бері бүгінге дейін қазіргі заң жобасын есептемегенде, жалпы 12 қылмыстық іс қылмыссыздандыруға ұшырады. Бұл сол жұмыстың заңды жалғасы. Оның үстіне Президент Қазақстан халқына Жолдауында және Жарлығында осы мәселеге тоқталды. Сондықтан қазір сіз атап өткен 2 бап бар, одан бөлек ішінара қылмыстық сипаттан арылтудың тағы 2 бабы бар. Бұл баптарды қылмыстық сипаттан арылтуда сот тергеу практикасын ескердік», - деді А. Құспан.
Оның айтуынша, осы баптарды қылмыссыздандыру бағытында кәсіпкерлік субъектілердің, «Атамекен» ұлттық кәсіпкерлер палатасының өкілдері мен барлық уәкілетті органның пікірлері ескерілген.
«Екінші сұрағыңызға тоқталайын. Егер осы баппен бүгінге дейін қылмыстық жауапкершілікке тартылып жатқан кәсіпкерлер болса, оларға қатысты қылмыстық іс дереу тоқтатылады. Егер бұрын сотталған кәсіпкерлер болса, олардың соттылығы жойылады, яғни қандай да бір құқықтық салдары болмайды», - деді депутат.
Бұдан бұрын хабарланғандай, бүгін Мәжілістің жалпы отырысында «Қазақстан Республикасының кейбір заңнамалық актілеріне экономикалық құқық бұзушылықтарды одан әрі қылмыстық сипаттан арылту және заңсыз жолмен алынған кірістерді жылыстатуға және терроризмді қаржыландыруға қарсы іс-қимыл мәселелері бойынша өзгерістер мен толықтырулар енгізу туралы» заң жобасы мен ілеспе құжат бірінші оқылымда мақұлданды.
