ҚХЛ: «Барыс» плей-офф сериясының бірінші ойынында «Автомобилистен» басым түсті
АСТАНА. ҚазАқпарат - Астаналық «Барыс» Гагарин Кубогының плей-офф сериясының бірінші ойынында өз алаңында екатеринборлық «Автомобилисті» ұтты.
Ойының бірінші кезеңінде қарсыластар есеп ашқан жоқ. Кездесудің келесі кезеңдерінде ойын қыза түсіп, қос команда да негізгі уақытта 2:2 есебімен тең түсті. Алайда тағайындалған қосымша овертаймда да қарсыластардың мықтысы анықталған жоқ, тек екінші экстра-таймда астаналықтар үшінші шайбасын салып, 3:2 есебімен алға шықты.
ҚХЛ аясындағы плей-офф тартысында ертең «Барыс» өз алаңында «Автомобилист» хоккейшілерімен екінші ойынын сағат 17:00-де «Қазақстан» спорт сарайында өткізеді.
