ҚХЛ: Ханты-Мансийскіде астаналық «Барыс» хоккейшілері «Югра» командасымен кездеседі
АСТАНА. 7 қаңтар. ҚазАқпарат /Руслан Ғаббасов/ - Бүгін Құрлықтық хоккей лигасы аясында Ханты-Мансийскіде астаналық «Барыс» хоккейшілері «Югра» командасымен кездеседі.
Турнирлік кестеге қарағанда, қос команда да қатар келе жатыр. Атап айтқанда ҚХЛ-дың Шығыс конференциясында 59 ұпай жинаған «Барыс» 7 орында, ал «Югра» (59 ұпай) 8 орында тұрақтады.
Осының алдындағы ойынында «Югра» «Нефтехимик» командасына 3:6 есебімен ұтылған болатын. Астаналық команда керісінше «Металлург» хоккейшілерімен болған кездесуін 2:1 есебімен жеңіспен аяқтады.
Ханты-Мансийск командасымен «Барыс» үш мәрте кездесіп, оның екеуінде «югралықтар» ұтты. Естеріңізге салсақ, қос команданың соңғы кездесуінде астаналық хоккейшілер өз айдынында «Юградан» 0:7 есебімен айқын басымдықпен жеңілген еді.